Bund Gali Main Sham - بند گلی میں شام (یادداشتیں)

بند گلی میں شام ایک ایسے لکھنے والے کی یادداشتوں پر مبنی تحریر ہے ، جنہوں نے اپنی افتاد طبع کے سبب خود کو شعر و ادب کے وقتی ہنگاموں سے ہمیشہ دور رکھا ، مگر اپنی تخلیقات کی بدولت اردو ادب کے قاری اور ناقد کو اپنی موجودگی کا برابر احساس دلاتے رہے۔ یاد نگاری ایک طرح سے خود کو آواز دینا ہے یا پھر گزرے ہوئے کل کو پکارنا۔ توصیف تبسم کو اپنے طویل ادبی سفر میں بعض معروف اور غیر معروف ادبی شخصیات کو قریب سے دیکھنے ، اُن کی دلچسپ باتیں سننے اور اُن سے گفتگو کرنے کا موقع ملا۔ اُنہوں نے ان تمام باتوں کو کمال دیانتداری سے بعد میں آنے والوں کے سپرد کر دیا ہے کہ ” بند گلی میں شام لکھنے والے کی مختصر سوانح ہی نہیں بلکہ کسی حد تک اُن کے اپنے عہد کی اجمالی ادبی تاریخ بھی بن گئی ہے۔ تحقیقی نقطہ نظر سے بھی یہ کتاب اہم ہے کیونکہ اس میں بعض بڑی ادبی شخصیات کے بارے میں ایسی باتیں محفوظ ہوگئی ہیں جو کہیں اور دستیاب نہیں۔ پیرایہ بیان اتنا دلچسپ ہے کہ بیان کردہ حقائق و واقعات پر کہانی کا سا گمان ہوتا ہے۔